Santo San Juan!

Viva San Juan!

Isang napakalaking pagpapala ang hatid ng araw na ito sa bawat isang mananampalataya ng Simbahang Katolika. Dahil ngayon ang araw ng Dakilang Kapistahan ni San Juan Bautista. Siya ang banal na ipinanganak ni Isabel na noo’y napakatanda na ng mga panahong iyon at imposible nang magkaanak. Subalit dahil sa namagitan ang Diyos ay nagpakita ang Anghel Gabriel sa ama nitong si Zakarias at sinabi sa kanya na magkakaanak sila at ito’y pangangalanan nilang Juan.

 

Ang Pagbibinyag  ni

 San Juan Bautista Kay Jesus  

Si San Juan ang isinugo ng Panginoon upang ihanda ang daraanan ng kanyang Anak na si Hesus. Siya ay tinawag na Bautista dahil sa pangyayaring nagbibinyag siya sa Ilog Jordan. Siya rin ang nagbinyag sa kanyang pinsang si Hesus. Namatay siya ng papugutan siya ng ulo ni Haring Herodes matapos ilagay ito sa plato ayon sa kahilingan ng anak ni Herodias na kanyang pinangakuang ibibigay ang anumang naisin nito.

Sa isang dako naman ng Pilipinas, dito sa amin sa may Kanlurang bahagi ng Batangas ay kilalang-kilala na ang tradisyung nakasanayan ng gawin ng mga tao sa tuwing sasapit ang ika-24 ng Hunyo.

Sa Bayan ng Lian, kung saan naririto ang Parokya ni San Juan Bautista na itinalagang Archdiocesan Shrine of St. John The Baptist noong Ika- 29 ng Agosto, 2011 ay kilalang-kilala ang debosyon ng mga tao kay San Juan. Nakagawian na ng mga tao ang “Santuhan” na tinatawag- kung saan ang replica  ng nasabing santo ay iniiikot sa bawat sulok ng bayan at madalas ay inililibot din sa karatig-Bayan nito upang maipalaganap ang pananampalatay sa mga tao.Noong panahong una-una ay orihinal na imahe ang ipinapadala ng simbahan sa mga tao subalit nang maging shrine na ito ay pinagpasyahan na lamang na ilagay ang orihinal na imahe sa loob ng simbahan kung saan napakarami rin ng pumipila at nagtitiis ng init at ngawit makahawak at makahalik lamang sa Santo San Juan.

Ang Orihinal na imahe ng mahal na Poong San Juan Bautista

(Photo by: Ver Bayaborda via Facebook)

   

  Archdiocesan Shrine of St. John the Baptist

   

Paghahatid ng Poong Santo San Juan sa mga bahay-bahay.

Kali-kaliwa na rin ang maririnig mong pagtugtog ng iba”t- ibang grupo ng mga banda. Nakagawian na rin ng mga tao ang pagsasayaw ng “Subli”  bilang pagpaparangal sa kanilang pinakamamahal na Santo.

Kaunting pasilip ng Santuhan ng Lian, Batangas

(Video by: Valentina Lambat via facebook)

Basaan sa Balayan

Dito naman sa Bayan ng Balayan kung saan ang San Juan ay itinuturing nilang ikalawang Patron ng bayan. Nakagawian naman ng mga tao rito ang “Basaan” kung tawagin. Ito ng literal na pagbubuhos ng tubig sa mga taong bibisita sa bayan na ito sa araw ng kapistahan. Sumisimbolo ito sa pagbibinyag na ginawa ni San Juan Bautista  noong panahon niya. Kaalinsabay nito ang pangangaral niya sa mga taong sumusunod sa kanya tungkol sa pagdating ng Mesiyas na siyang tutubos sa ating mga sala. Makikita mo ang iba’t-ibang pamamaraan ng mga tao, bata man o matanda makapambuhos lamang ng tubig. Mayroong gumagamit ng host. Ang iba naman ay may dalang mga naglalakihang “water guns”. Maroon din namang nagsasama ng yelo sa timba ng tubig upang maramdaman ng tao ang kakaibang lamig na dulot nito. Makikita mo ang mga ngiti ng mga tao sa pakikiisa sa pagdiriwang. Sabi nila, mag-antanda ka raw ng krus kapag nabasa ka dahil ito ay isang biyaya.

Isa pa sa pinakahihintay na kaugalian rito sa Balayan  ay ang “Parada ng Lechon”. Dito ay ipinaparada ang mga Lechong Baboy at kanilang ginagayakan ng iba’t-ibang kasuotan. Libre rin ang pagkurot sa mga lechong ito kaya hindi mo kailangang mamroblema sakaling ikaw ay magutom. Ang kaugalian namang ito ay sumisimbols sa hinarap na kamatayan ng ating santo at martir.

Ang mga inihahandang mga Lechon.

(Image Source:http://www.metrokelan.com/oc-content/uploads/3/377.jpg)

(Image Source: https://s-media-cache-ak0.pinimg.com/736x/48/b6/91/48b69121944542e6fa170255b9194f97.jpg)

Ang mga lechon sa iba’t-ibang kasuotan

(Image Source: http://balayan.gov.ph/wp-content/uploads/2014/02/parada-ng-lechon.jpg)

Lubha nga namang napakayaman ng ating pananampalataya kaya naman tayo ay hinahangaan ng mga nakararami. Lahat ay nagsasaya at lubos na natutuwa sa mga kaganapan sa araw na ito subalit ating tatandaan kung ano ba talaga ang tunay na esensya ng ating pagdiriwang at kagalakan: Ito ay walang iba kundi ang pagpapasalamat sa Poong Maykapal sa pagbibigay sa atin ng huwarang Santo sa kababaang-loob na ipinakita nito at ang kasimplehang taglay niya hanggang kamatayan. Na balang araw, ating pagsusumikapan at ipagdarasal na maging katulad tayo ng ating patron….SAN JUAN BAUTISTA.

Viva San Juan!